കോച്ച് എറിക് ടെൻ ഹാഗിനെ പുറത്താക്കിയ ഒഴിവിലേക്ക് താത്കാലികമായി വന്ന റൂഡ് വാൻ നിസ്റ്റിൽറൂയ് യുണൈറ്റഡിൻ്റെ പുതിയ കോച്ച് അമോറിമിൻ്റെ വരവോടെ പുറത്തായെങ്കിലും, മൂന്ന് പ്രീമിയർ ലീഗ് ക്ലബ്ബുകളാണ് നിസ്റ്റിൽറൂയ്ക്കായി വലവിരിക്കുന്നത്. യുണൈറ്റഡ് കോച്ചായി സ്ഥാനമേറ്റ അമോറിം, സഹ പരിശീലകരെ ഒപ്പം കൂട്ടിയതിനാലാണ് നിസ്റ്റിൽറൂയ്ക്കു പുറത്തു പോകേണ്ടിവന്നത്.

റിപോർട്ടുകൾ പ്രകാരം പ്രീമിയർ ലീഗ് ക്ലബ്ബുകളായ ലെസ്റ്റർ സിറ്റി, വോൾവ്സ്, ക്രിസ്റ്റൽ പാലസ് എന്നിവരാണ് നിസ്റ്റിൽറൂയിൽ താല്പര്യം പ്രകടിപ്പിച്ചിരിക്കുന്നത്. ഏറ്റവും താഴെത്തട്ടിലുള്ള ടീമുകളുമായി കേവലം മൂന്നു പോയിൻ്റ് മാത്രം അകലത്തിലാണ് ലെസ്റ്റർ സിറ്റി. വോൾവ്‌സിൻ്റെയും പാലസിൻ്റെയും സ്ഥിതി വളരെ ദയനീയമാണ്. നിലവിൽ അവർ 19ഉം 18ഉം സ്ഥാനത്താണ്.

മോശം പ്രകടനം മൂലം നിലവിലെ പരിശീലകരെ പുറത്താക്കാൻ സാധ്യത കല്പിക്കുന്ന ഈ ടീമുകൾ തങ്ങളുടെ പരിശീലകനായി കൊണ്ടുവരാൻ പരിഗണിക്കുന്നത് റൂഡ് വാൻ നിസ്റ്റിൽറൂയിയെയാണ്. യുണൈറ്റഡിനൊപ്പം താത്കാലിക പരിശീലകൻ്റെ റോളിൽ നിസ്റ്റിൽറൂയ് കാഴ്ചവെച്ച മികച്ച പ്രകടനമാണ് നിസ്റ്റിൽറൂയിയെ പരിശീലകനാക്കാൻ ഈ ടീമുകൾ ശ്രമിക്കുന്നതിൻ്റെ പ്രധാന കാരണം. അങ്ങനെ സംഭവിച്ചാൽ ഉടൻതന്നെ നിസ്റ്റിൽറൂയ് പരിശീലക കുപ്പായത്തിൽ പ്രീമിയർ ലീഗിൽ തിരിച്ചെത്തും.